uupar badal niche parbat biich men ḳhvab ghazalan ka
dekho main ne harf jama ke nagar banaya janan ka
pagal panchhi ba.ad men chahke pahle main ne dekha tha
us jampar ki shiknon men halka sa rang baharan ka
basti yunhi biich men aa.i asl men jang to mujh se thi
jab tak mere baagh na Duube zor na TuuTa tufan ka
ham imlak-parast nahin hain par yuun hai to yunhi sahi
ik tire dil men ghar hai apna baaqi mulk sulaiman ka
ranj ka apna ek jahan hai aur to jis men kuchh bhi nahin
ya gahrav samundar ka hai ya phailav bayaban ka
ham koi achchhe chor nahin par ek daf.a to ham ne bhi
saara gahna luuT liya tha aadhi raat ke mehman ka
Leave a Reply