ehtiyatan use chhua nahin hai
aadmi hai koi ḳhuda nahin hai
dasht men aate jaate rahte hain
ye hamare liye naya nahin hai
tum samajhte ho naḳhuda ḳhud ko
tum pe dariya abhi khula nahin hai
jis ka hal sochne men vaqt lage
vo mohabbat hai mas.ala nahin hai
baagh par sher kahne valon ka
ek misra.a hara-bhara nahin hai
ret hi ret hai tah-e-dariya
ya.ani sahra abhi mira nahin hai
aao chalte hain ab ḳhala ki taraf
sun rahe hain vahan ḳhala nahin hai
Leave a Reply