nashtar si dil men chubhti hui baat le chalen
aa.e hain to ḳhulus ki saughat le chalen
viraniyon ke ghar men mira dam hi ghuT na jaa.e
aa ai ḳhayal-e-yar tujhe saath le chalen
jab raushni thi chalta tha saaya bhi saath saath
ab hai andheri raat kise saath le chalen
jis men umid-o-yas fareb-e-nazar rahi
is haft-ḳhvan-e-gham ki rivayat le chalen
sham-e-umid jis men farozan na ho saki
ab us ki bazm-e-naz men vo raat le chalen
kuchh bekason ke ghar jale kuchh be-dayar hain
un ke huzur ashkon ki barsat le chalen
rang-e-shafaq men ḳhun-e-shahidan hai jalva-gar
apne aziim mulk ki saughat le chalen
apne nagar men bas yahi kirchen hain har taraf
kuchh gauhar-e-talafi-e-mafat le chalen
Leave a Reply