vo jo ham-rahi ka ghurur tha vo savad-e-rah men jal-bujha
tu hava ke ishq men ghul gaya main zamin ki chaah men jal-bujha
ye jo shaḳh-e-lab pe hujum-e-rang-e-sada khila hai gali gali
kahin koi sho.ala-e-be-nava kisi qatl-gah men jal-bujha
jo kitab-e-ishq ke baab the tiri dastaras men bikhar ga.e
vo jo ahd-nama-e-ḳhvab tha vo miri nigah men jal-bujha
hamen yaad ho to suna.en bhi zara dhyan ho to bata.en bhi
ki vo dil jo mahram-e-raz tha kahan rasm-o-rah men jal-bujha
kahin be-niyazi ki laag men kahin ehtiyat ki aag men
tujhe meri koi ḳhabar bhi hai mire ḳhair-ḳhvah main jal-bujha
miri raakh se na.i raushni ki hikayaton ko sameT le
main charagh-e-sub.h-e-visal tha tiri ḳhema-gah men jal-bujha
vo jo harf-e-taza-misal the unhen jab se tu ne bhula diya
tiri bazm-e-naz ka bankpan kisi ḳhanqah men jal-bujha
Leave a Reply