Bismil Azimabadi
ab raha kya hai jo ab aa.e hain aane vaale
jaan par khel chuke jaan se jaane vaale
ye na samjhe the ki ye din bhi hain aane vaale
ungliyan ham pe uTha.enge uThane vaale
kaun samjha.e na iThla ke sar-e-rah chaliye
hain ye andaz gunahgar banane vaale
puchhne tak ko na aaya koi allah allah
thak ga.e paanv ki zanjir bajane vaale
kahin rona na paḌe tujh ko zamane ke saath
are o vaqt ki jhankar par gaane vaale
aap andaz-e-nazar apna badalte hi nahin
aur bure bante hain bechare zamane vaale
puchhti hai dar-o-divar se bimar ki aankh
ab kahan hain vo mire naaz uThane vaale
ba-ḳhuda bhuul ga.e apni musibat ‘bismil’
yaad jab aa.e mohammad ke gharane vaale
Leave a Reply