chashm-e-qatil hamen kyunkar na bhala yaad rahe
maut insan ko lazim hai sada yaad rahe
mera khuun hai tire kuche men baha yaad rahe
ye baha vo nahin jis ka na baha yaad rahe
kushta-e-zulf ke marqad pe tu ai laila-vash
bed-e-majnun hi laga ta-ki pata yaad rahe
khaksari hai ajab vasf ki juun juun ho siva
ho safa aur dil-e-ahl-e-safa yaad rahe
ho ye labbaik-e-haram ya ye azan-e-masjid
mai-kasho qulqul-e-mina ki sada yaad rahe
yaad us vada-faramosh ne ghairon se badi
yaad kuchh kam to na thi aur siva yaad rahe
khat bhi likhte hain to lete hain khatai kaghaz
dekhiye kab tak unhen meri khata yaad rahe
do varaq men kaf-e-hasrat ke do aalam ka hai ilm
sabaq-e-ishq agar tujh ko dila yaad rahe
qatl-e-ashiq pe kamar bandhi hai ai dil us ne
par khuda hai ki use naam mira yaad rahe
taer-e-qibla-numa ban ke kaha dil ne mujhe
ki tadap kar yuun hi mar jaega ja yaad rahe
jab ye din-dar hain duniya ki namazen padhte
kaash us vaqt unhen nam-e-khuda yaad rahe
ham pe sau baar jafa ho to rakho ek na yaad
bhuul kar bhi kabhi hove to vafa yaad rahe
mahv itna bhi na ho ishq-e-butan men ai ‘zauq’
chahiye bande ko har vaqt khuda yaad rahe