Dilon Ki KHak uDne Se Tumhein Kya Farq paDta Hai

Asim Tanha

dilon ki ḳhaak uḌne se tumhen kya farq paḌta hai

kisi ke jiine marne se tumhen kya farq paḌta hai

tumhare ghar ke raste ki udasi ḳhatm ho jaa.e

mujhe ghar tak… bulane se tumhen kya farq paḌta hai

tumhen achchhi nahin lagtin miri ḳhushiyan batao kyon

mire hansne-hansane se tumhen kya farq paḌta hai

tumhen to chhat mayassar hai salamat hai tumhara ghar

mira ghar Duub jaane se tumhen kya farq paḌta hai

mire atraf dushman hain para.e aur apne bhi

laḌe tanha zamane se tumhen kya farq paḌta hai