jo nazar kiya main sifat men hua mujh pe kab ye ayaan nahin
miri zaat ain ki ain hai vahan dusri ka nishan nahin
vahi do jahan men hai muftakhar jaise ainiyat ki hui khabar
vahi hukmaran hai jahan men vahan kufr-o-din ka guman nahin
rahe ghairiyat ke hijab men jo khuda-numa se nahin mile
jo khuda ko un se talab kiye rahi baat un pe nihan nahin
jise ho subut vajud ka vahi haq-shanas hai ba-khabar
unhen jumla aave khuda nazar vo khuda ko dekhe kahan nahin
main vatan men aap safar kiya jo qadam ko apni nazar kiya
mila apna aap pata mujhe jahan ghairiyat ka bayan nahin
main to ek ‘markaz’-e-dahr huun jo khuda-numa ke nishan se
jo bataun haq ka pata jise rahe baaqi us ko guman nahin
Leave a Reply