shahar men ole paḌe hain sar salamat hai kahan
is qadar hai tez andhi ghar salamat hai kahan
raat ne aisi siyahi ab bikheri char-su
aankh valon ke liye manzar salamat hai kahan
aap kahte hain chhupa luun apni uryani magar
jism se lipTi hui chadar salamat hai kahan
qulqul-e-mina se apni pyaas to bujhti nahin
chuur sab shishe hue saghar salamat hai kahan
reza reza ho ga.i har shaḳhs ki pakizgi
sang-sari ke liye patthar salamat hai kahan
koi chehra asl surat men rahe baaqi to kyuun
but-shikan ke ahd men aazar salamat hai kahan
har taraf ik jang ka mahaul hai ‘azam’ yahan
aadmi ab ghar ke bhi andar salamat hai kahan
Leave a Reply