kuchh uzr pas-e-va.ada-ḳhilafi nahin rakhte
ho kaise masiha dam-e-shafi nahin rakhte
aise to na the zaḳhm ki jo bhar hi na paate
ahbab magar zarf-e-talafi nahin rakhte
is chain se jiine men koi bhed nahin hai
bas ye ki tamanna.en izafi nahin rakhte
is daur men insaf panap hi nahin sakta
iḳhlas-e-qalam jis men sahafi nahin rakhte
hain aur bhi duniya men suḳhnavar bahut achchhe
ham jaisa magar zauq-e-qavafi nahin rakhte
ye mo.ajiza mohtaj hai pindar-e-vafa ka
sab teshe dam-e-koh-shigafi nahin rakhte
har baat men kam-maya nazar aate hain ‘anjum’
rahat to kuja dard bhi kaafi nahin rakhte
Leave a Reply