Mohabbat Mein Kami Aane Lagi Hai

mohabbat meñ kamī aane lagī hai

use masrūfiyat khāne lagī hai

abhī tum the ujālā thā magar ab

achānak tīrgī chhāne lagī hai

sukūñ milne lagā hai ab junūñ se

mirī vahshat mujhe bhāne lagī hai

diloñ ko Das rahī hai bad-gumānī

ye nāgin zahr phailāne lagī hai

sahelī hai mirī barsoñ purānī

udāsī mujh ko ḳhush aane lagī hai

ajab sī dil meñ chiñgārī dabī thī

jise barsāt bhaḌkāne lagī hai

Leave a Comment