kahte hain log ye ki baḌi dil-nashin hai shaam
lekin mujhe ye lagta hai andoh-gin hai shaam
ye ik chhalava hai ki pahaḌon ki aag hai
vahm-o-guman ki shakl men jaise yaqin hai shaam
kya us ko DhunDte ho ḳhalaon ke darmiyan
tum apne dil men khoj ke dekho yahin hai shaam
ye kaisi machhliyan hain chamakti hain raat bhar
ye jhiil hai ki ek nigah-e-hasin hai shaam
donon ka vasl ho to shafaq-rang ho ye dil
hai raat asman to goya zamin hai shaam
din ka gunah raat ke sar aa gaya hai kyun?
kya shab ki be-gunahi ki shahid nahin hai sham?
ye to badal chuki hai ‘karamat’ hava ka ruḳh
kaise kahun ki vaqt ke zer-e-nagin hai shaam
Leave a Reply