Kisi Ko Phir Use Pane Ki Zid Hai

kisī ko phir use paane kī zid hai

hamāre darmiyāñ aane kī zid hai

mirī chāhat hai us ko rok lenā

magar vo hai ki bas jaane kī zid hai

dayār-e-shām se aage nikal kar

mohabbat ke azā-ḳhāne kī zid hai

shu.ūr-e-ġham vahāñ pahuñchā ki ab to

ḳhushī ko marsiya-ḳhāne kī zid hai

kisī kī pyaas zinda jāvedāñ hai

kisī ko phir se mar jaane kī zid hai

furāt-e-jism se ḳhemeñ haTā kar

amīr-e-shām ke aane kī zid hai

Leave a Comment