Shahid Kamal
men kya huun kaun huun ye batane se main raha
ab ḳhud ko ḳhud se ḳhud ko milane se main raha
main laḌ paḌa huun aaj ḳhud apne ḳhilaf hi
ab darmiyan se ḳhud ko haTane se main raha
hai zindagi asir-e-adam janta huun main
duniya tire fareb men aane se main raha
mujh men kahan hai tujh se juda.i ka hausla
ai meri jaan tujh ko ganvane se main raha
vahshat bhi apni itni ta.aqqul pasand hai
dasht-e-junun men ḳhaak uḌane se main raha
haan vaz-e-ehtiyat ka qaa.il nahin huun men
jo zaḳhm hai jigar men chhupane se main raha
vo log mera nam-o-nasab puchhte hain ab
jin ki nazar men ek zamane se main raha
kuchh yaar mere itne sata.ish pasand hain
‘shahid’ ab un ko sher sunane se main raha
Leave a Reply