aao ab zabt azma.en ham
ek duuje ko bhuul jaa.en ham
kyon na ik baar aisa vasl karen
jism ko duur chhoḌ aa.en ham
zindagi jab safar hai do din ka
kyon na ik ham-safar bana.en ham
ham ko apni koi ḳhabar hi nahin
ḳhud ko kaise talash laa.en ham
baḌi mushkil se ek jaan mili
kaise is jaan ko ganva.en ham
ḳhud-kushi kyon na is ada se karen
us ki ankhon men Duub jaa.en ham
tum shikasta badan ho kyon ‘kashif’
ahl-e-duniya ko kya bata.en ham
Leave a Reply