qateel-shifai

Jo Bhi Ghuncha Tere Honton Pe Khila Karta Hai

jo bhi ghuncha tire honton pe khila karta hai

vo tiri tangi-e-daman ka gila karta hai

der se aaj mira sar hai tire zaanu par

ye vo rutba hai jo shahon ko mila karta hai

main to baitha huun dabae hue tufanon ko

tu mire dil ke dhadakne ka gila karta hai

raat yuun chand ko dekha hai nadi men raqsan

jaise jhumar tire mathe pe hila karta hai

jab miri sej pe hota hai baharon ka nuzul

sirf ik phuul kivadon men khila karta hai

kaun kafir tujhe ilzam-e-taghaful dega

jo bhi karta hai mohabbat se gila karta hai

log kahte hain jise nil-kanval vo to ‘qatil’

shab ko un jhiil si ankhon men khila karta hai

More Poems

Leave a Comment