Jahan-E-Rang-O-Bu Par Chha Raha Hai

Laxmi Narayan Farigh

jahan-e-rang-o-bu par chha raha hai

har ik parde se vo jalva-numa hai

bashar Thokar pe Thokar kha raha hai

saza apne kiye ki pa raha hai

tamanna aur phir un ki tamanna

ye irfan-e-ḳhudi ki intiha hai

buton ko dekh kar aata hai tu yaad

buton ke husn men jalva tira hai

kahin tu hai kahin tasvir teri

na ka.aba hai na koi but-kada hai

tumhari yaad kar leta huun taaza

buton ko kaun kafir pujta hai

nahin chara kisi ke paas is ka

mohabbat ek dard-e-la-dava hai

sharab-e-zist piita ja raha huun

surur-e-hosh baḌhta ja raha hai

jigar men chubh rahi hai nok-e-mizhgan

bala ka dard ‘farigh’ ho raha hai