Ruh Labon Tak Aa Kar Soche

ruuh labon tak aa kar soche kaise chhodun qarya-e-jan

yusuf qasr-e-shahi men bhi kab bhula kanan ki galiyan

maut qarib aai to duniya kitni muqaddas lagti hai

kahish-e-dil bhi khvahish-e-dil hai afat-e-jan bhi rahat-e-jan

meri vahshat ko to bahut thi gosha-e-chashm-e-yar ki sair

yuun to adam men vusat hogi arsh-ba-arsh karan-ba-karan

ghunche ab tak rang bhare hain ab tak hont umang-bhare

tuti-phuti qabron se hain pathrai ankhen nigaran

sirf ik nigah-e-garm se tuten shoalon men parvan chadhen

haae ye nazuk nazuk rishte haae ye bazm-e-shish-garan

dasht-o-daman men koh kamar men bikhre hue hain phuul hi phuul

ru-e-nigar-e-giti par hain sabt mire boson ke nishan

aankh ki ik jhapki men biita kitne baras ka qurb-e-jamal

ishq ke ik pal men guzre hain kitne qaran kitni sadiyan

saari duniya mera kaaba sab insan mere mahbub

dushman bhi do ek the lekin dushman bhi to the insan

dard-e-hayat kahin ab ja kar banne laga tha husn-e-hayat

kis ko khabar thi mahv rahegi qat-e-safar men umr-e-ravan

jannat ki yakh-bastagyon ko garmaega us ka khayal

subh-e-abad tak jami rahe ye anjuman-e-atish-e-nafasan