savad-e-sham na rang-e-sahar ko dekhte hain
bas ik sitara-e-vahshat-asar ko dekhte hain
kisi ke aane ki jis se khabar bhi aati nahin
na jaane kab se usi rahguzar ko dekhte hain
khuda-gavah ki aina-e-nafas hi men ham
khud apni zindagi-e-mukhtasar ko dekhte hain
to kya bas ek thikana vahi hai duniya men
vo dar nahin to kisi aur dar ko dekhte hain
suna hai shahr ka naqsha badal gaya ‘mahfuz’
to chal ke ham bhi zara apne ghar ko dekhte hain
Leave a Reply