kyon ḳhayal-e-ruḳh-e-mahbub ka ehsan hota
dil jala tha to charagh-e-shab-e-hijran hota
iid hoti tire divane ki aati jo bahar
jhuk ke daman se ham-aghosh gareban hota
shab-e-mahtab men vo ruḳh se ulaTte jo naqab
gird phir phir ke tasadduq mah-e-taban hota
ḳhair guzri ki tiri bazm men behosh the sab
varna jo hosh men aata vo pasheman hota
vaste main ne shab-e-vasl ḳhuda ke bhi diye
maan hi jaata vo kafir jo musalman hota
ai junun mujh se qasam le ki bahut muflis huun
kya kafan ke liye rakkha jo gareban hota
Thokaren vadi-e-ghurbat ki na khata ‘safdar’
ai falak us ka bhara ghar jo na viran hota
Leave a Reply