ik ham ki un ke vaste mahv-e-fughan rahe
ik vo ki dast-e-shauq se daman-kashan rahe
dil men yahi ḳhalish rahe soz-e-nihan rahe
lekin mazaq-e-ishq-o-mohabbat javan rahe
ik vaqt tha ki dil ko sukun ki talash thi
aur ab ye aarzu hai ki dard-e-nihan rahe
ahl-e-vafa par aa.iin hazaron musibaten
ye sab rahin-e-gardish-e-haft-asman rahe
un ka shabab har gul-e-nauras se phaT paḌa
chhupne ke bavajud vo har su ayaan rahe
ham ne hazar tarah kiya un ko mutma.in
har baat par vo ham se magar bad-guman rahe
allah re talḳh-kami-e-ulfat ki intiha
mujh se mire ‘aziz’ bhi daman-kashan rahe
Leave a Reply