Poet
saja.en mahfil-e-yaran na shaghl-e-jam karen
to aur kaise tire gham ka ehtiram karen
kise bula.en chanaron men aadhi raat ga.e
agar karen to kise sub.h ka salam karen
basa.en qaf-e-tasavvur men ik pari-vash ko
kuchh aaj ishrat-e-hijran ka ehtimam karen
julus-e-shola-ruḳhan kis taraf ko guzrega
koi bata.e kahan ahl-e-dil qayam karen
chalo ki ḳhema-e-mahbub koi duur nahin
uTho ki aaj ki shab men junun ka naam karen
hamare jaam men mai bhi hai ḳhun-e-dil bhi hai
ye dekhna hai ḳhuda vaale kya haram karen
Leave a Reply