akeli ruuh akela mira badan bhi hai
akele-pan ka ye sahra mira chaman bhi hai
kushud-e-zat ka munkir tha kab ḳhabar thi mujhe
barahnagi hi miri mera pairahan bhi hai
ḳhud apne qurb ki tanhaiyon men guzra hai
vo ek lamha ki ḳhalvat bhi anjuman bhi hai
kuchh itna sahl nahin mera faash ho jaana
mire badan pe to ḳhvabon ka pairahan bhi hai
bana raha tha vo harf-o-sada ke gul-buTe
use ḳhabar na thi ik sochne ka fan bhi hai
Leave a Reply