Nadeem Sirsivi
shu.ur-e-ishq mile ru-e-dar raqs karun
hain mere paas bahane hazar raqs karun
gulu-e-ḳhushk ki shah-e-rag thak ke kahti hai
kuchh aur tez ho ḳhanjar ki dhaar raqs karun
tavaf-e-ḳhana-e-dildar gar nasib nahin
ḳhud apne dil ka bana kar mazar raqs karun
barahna jism hai kohna libas phaT gaya hai
so oḌh kar main rida-e-ghubar raqs karun
ujaaḌ dasht men maqtal ye baar baar saje
lahu men Duub ke main baar baar raqs karun
ani kuchh aur chubha ai sitam-shi.ar ki main
taḌap ke dard men be-band-o-bar raqs karun
dua hai meri main zaḳhmon ki taab la na sakun
sharab maut ka jaage ḳhumar raqs karun
suna chuka sar-e-neza main ek taaza ghazal
‘nadim’ hai mujhe ab iḳhtiyar raqs karun
Leave a Reply