Samad Ansari
patthar ki niind soti hai basti jaga.iye
ab-e-hayat sa koi e.ajaz la.iye
jal ja.iye maqam pe apne misal-e-sham.a
apne badan ki lau se na ghar ko jala.iye
ik nahr kaTiye kabhi siine se chand ke
daman-e-shab men nuur ka dhara baha.iye
aa to ga.e hain aap ḳharidar ki tarah
kuchh tan ko ḳharch kijiye jaan ko bhuna.iye
jin ke dhuen se phailti hai afiyat ki lau
aise bhi kuchh charagh sar-e-shab jala.iye
abad kijiye isi ghar men junun ko aap
is ghar men kya nahin hai jo sahra ko ja.iye
phuTa hai jis se raat ke siine men mahtab
ik biij aisa zulmat-e-dil men uga.iye
chahat men un ki biit ga.i zindagi ‘samad’
ḳhud ko bhi pyaar kijiye ḳhud ko bhi chahiye
Leave a Reply