imtihan lene chala hai miri binai ka
us ko andaza nahin baat ki gahrai ka
is liye rok liya uttha hua haath ham ne
us ke har vaar men andaz tha paspai ka
khvab likhti rahin ankhen dar-o-bam-e-shab par
subh ik pahlu dikhati rahi sachchai ka
ajnabi ho gae ik chhat tale rahne vaale
kuchh to kaffara ada karna tha yakjai ka
main ne manga tha zara der ko chehra apna
aaina de gaya ik zakhm shanasai ka
banu-e-sham tire surmai anchal se pare
koi sathi hai miri badiya-paimai ka
ab chatak ya na chatak ghuncha-e-khatir main ne
rasta chhod diya dekhna purvai ka
us se mil kar hui har baar mohabbat taaza
us ne badla nahin andaz pazirai ka
Leave a Reply