main ek qarz huun sar se utaar de mujh ko
laga ke daanv pe ik roz haar de mujh ko
bikhar chuka huun gham-e-zindagi ke shanon par
ab apni zulf ki surat sanvar de mujh ko
hazar chehre ubharte hain mujh men tere siva
main aa.ina huun to gard-o-ghubar de mujh ko
kisi ne haath baḌhaya hai dosti ke liye
phir ek baar ḳhuda e’tibar de mujh ko
main bhuuk pyaas ke sahra men ab bhi zinda huun
javaharat ki kirnon se maar de mujh ko
Leave a Reply