Dil Par Jo zaKHm Hain Wo Dikhaen Kisi Ko Kya

Habib Jalib

dil par jo zaḳhm hain vo dikha.en kisi ko kya

apna sharik-e-dard bana.en kisi ko kya

har shaḳhs apne apne ghamon men hai mubtala

zindan men apne saath rula.en kisi ko kya

bichhḌe hue vo yaar vo chhoḌe hue dayar

rah rah ke ham ko yaad jo aa.en kisi ko kya

rone ko apne haal pe tanha.i hai bahut

us anjuman men ḳhud pe hansa.en kisi ko kya

vo baat chheḌ jis men jhalakta ho sab ka gham

yaden kisi ki tujh ko sata.en kisi ko kya

so.e hue hain log to honge sukun se

ham jagne ka rog laga.en kisi ko kya

‘jalib’ na aa.ega koi ahval puchhne

den shahr-e-be-hisan men sada.en kisi ko kya