ne amiron men ne vaziron men
ishq ke ham to hain faqiron men
koi azad ho to ho yaaro
ham to hain ishq ke asiron men
banda-e-ishq haq hai apne yahan
taj-daron men takht-giron men
furqat-e-yar ki bhari hai bu
nala-ha-e-nai o nafiron men
zan-e-duniya murid kis ki nahin
ham bhi is qahba ke the piron men
ab to khamosh hain qafas men kabhi
naghma-sanjan the ham-safiron men
ham ko tu vajib-ul-vajud mila
ham kabiron men ham saghiron men
kunj-e-uzlat men yaar ko paaya
ne qalilon men ne kasiron men
shukr-e-haq kijiye ki hai ‘matam’
apne dildar dil-paziron men
Leave a Reply