dukha hai dil tabhi to mujh pe chha.i hai udasi bhi
miri palkon pe aansu bhi labon par hai ḳhamoshi bhi
juda.i men mire dil ki suno kya ho ga.i halat
mire dil men hai vahshat bhi baḌi hai be-qarari bhi
miri ankhon men virani mire dil ko pareshani
kuchh aisi chup hui huun main nahin hai ḳhud-kalami bhi
hamen to hijr men hi kaTni hai zindagi ab to
vo aa jaa.e nahin ummid baaqi ab zara si bhi
agarche choT gahri hai ‘dua’ phir bhi nahin badli
vahi hansne ki aadat bhi vahi hai ḳhush-mizaji bhi
Leave a Reply