Qamar Jalalvi
dekhte hain raqs men din raat paimane ko ham
saqiya raas aa ga.e hain tere mai-ḳhane ko ham
le ke apne saath ik ḳhamosh divane ko ham
ja rahe hain hazrat-e-naseh ko samjhane ko ham
yaad rakkhenge tumhari bazm men aane ko ham
baiThne ke vaste aghyar uTh jaane ko ham
husn majbur-e-sitam hai ishq majbur-e-vafa
sham.a ko samjha.en ya samjha.en parvane ko ham
rakh ke tinke Dar rahe hain kya kahega baghban
dekhte hain ashiyan ki shaḳh jhuk jaane ko ham
uljhanen tul-e-shab-e-furqat ki aage aa ga.iin
jab kabhi baiThe kisi ki zulf suljhane ko ham
raste men raat ko muDbheḌ saaqi kuchh na puchh
muḌ rahe the shaiḳh-ji masjid ko but-ḳhane ko ham
shaiḳh-ji hota hai apna kaam apne haath se
apni masjid ko sambhalen aap but-ḳhane ko ham
do ghaḌi ke vaste taklif ghairon ko na de
ḳhud hi baiThe hain tiri mahfil se uTh jaane ko ham
aap qatil se masiha ban ga.e achchha hua
varna apni zindagi samjhe the mar jaane ko ham
sun ke shikva hashr men kahte ho sharmate nahin
tum sitam karte phiro duniya pe sharmane ko ham
ai ‘qamar’ Dar tu ye hai aghyar dekhenge unhen
chandni shab men bula laa.en bula laane ko ham
Leave a Reply