Poet
hamen to ek hi chehra dikha.i deta hai
jise bhi dekhiye apna dikha.i deta hai
ye kis ne aise ujalon ki aarzu ki thi
har ek ghar yahan jalta dikha.i deta hai
na.i sahar ne ujale janam diye hain magar
ye ḳhvab phir bhi adhura dikha.i deta hai
yahan jo banTta phirta hai tishnagi ka bharam
mujhe to ḳhud bhi vo pyasa dikha.i deta hai
talash hai mujhe us mehrban ki muddat se
jo mahfilon men bhi tanha dikha.i deta hai
dhuan hai jalte hue ghar sulagte nazzare
main kya bata.un ki kya kya dikha.i deta hai
ise bhi kijiye apne giroh men shamil
ye shaḳhs apne hi jaisa dikha.i deta hai
ye kaisi aag men ham log jal rahe hain ‘ra.is’
har ik vajud pighalta dikha.i deta hai
Leave a Reply