vahm kaisa guman men bhi nahin
tum faqiron ke dhyan men bhi nahin
ham dil-e-dostan men rahte hain
tum to apne makan men bhi nahin
ab vo patthar kahan se aa.ega
ab tira ghar chaTan men bhi nahin
varna tum ko faroḳht kar dete
tum hamari dukan men bhi nahin
log raushan hain apni miTTi se
tum kisi ḳhak-dan men bhi nahin
ham to apne paron pe uḌte hain
tum para.i uḌaan men bhi nahin
aaj kya dhuup tum ko chaaT ga.i
aaj tum sa.eban men bhi nahin
ek rahat jo qurb-e-yar men hai
mai-kade ki amaan men bhi nahin
us ke lahje men vo miThas thi ‘qais’
apni urdu zaban men bhi nahin
Leave a Reply