Nazeer Nazar
chura.e nazren kabhi muḌ ke dekhta bhi hai
ki tiir tirchhi nigahon ke phenkta bhi hai
ajiib shaḳhs hai likh kar phir apne dil ka varaq
na jaane kaun si vahshat men moḌta bhi hai
tum is pe chal ke miri zaat men chale aao
ye pul-sirat tumhare liye khula bhi hai
samajh ke soch ke aana ki is mohabbat men
jahan sukun hai is men to rat-jaga bhi hai
main is haqir ko aḳhir ye kaise samjha.un
faqat ḳhata hi nahin ishq mo.ajiza bhi hai
main jis ko maar ke zinda bhi rah nahin sakta
vahi zamir hai mera vahi ḳhuda bhi hai
baḌe jatan se mila hijr-e-da.imi mujh ko
yahi maraz hai mira aur yahi dava bhi hai
bhale zamane ne bhar di hon talḳhiyan mujh men
miri zaban pe urdu ka za.iqa bhi hai
baḌe hi ghaur se sunta hai saare sher magar
ghalat kahan pe mujhe baḌh ke Tokta bhi hai
Leave a Reply