Azm Shakri
ḳhasta-jani men koi shaḳh hari chahte hain
tire bimar tiri charagari chahte hain
raushni ban ke utar shaam ke mehrabon par
ab tire log tiri jalvagari chahte hain
chak-damani se dikhte hain ta.alluq apna
ishq men ham bhi kahan baḳhiya-gari chahte hain
kis qadar dasht se manus hue hain shorafa
chhoḌ kar aish-o-tarab dar-ba-dari chahte hain
aur kuchh aur mahak shaam ki maḳhmur hua
ham tiri god gulabon se bhari chahte hain
Leave a Reply