Ye Mohabbat Ka Sila Tha Ishq Ka Anjam Tha

Mohammad Usmaan Arif

ye mohabbat ka sila tha ishq ka anjam tha

phuul ka hansna hi us ki maut ka paigham tha

gham na dete aap to rahat se kis ko kaam tha

zindagi ki gardishon ke saath daur-e-jam tha

Thokaren khate ga.e lab par tumhara naam tha

hashr ka manzar tha rah-e-ishq men jo gaam tha

aap kyuun aansu baha.en mere hal-e-zar par

ishq ka nikla vahi anjam jo anjam tha

ban gaya har saans qatil ranj hai to bas yahi

zindagi ne maar Daala maut par ilzam tha

tha tumhare samne be-kaif rang-e-gulistan

dida-e-nargis to kahne ko chhalakta jaam tha

dekhne vaale kahenge meri barbadi ka haal

ashiyana jal raha tha main asir-e-dam tha

girya-e-shabnam se aati hai gulon men tazgi

mera rona bhi kisi ke aish ka paigham tha

barq ke kya haath aaya kya mila sayyad ko

chaar tinkon ke na rahne se chaman badnam tha

jalne vaala hi samajh sakta hai dil ki aag ko

hijr men ‘arif’ mira hamdam charagh-e-sham tha