vahi narm lahja
jo itna mulaem hai jaise
dhanak giit ban ke samaat ko chhune lagi ho
shafaq narm komal suron men koi pyaar ki baat kahne chali ho
kis qadar rang-o-ahang ka kis qadar khubsurat safar
vahi narm lahja
kabhi apne makhsus andaz men mujh se baten karega
to aisa lage
jaise resham ke jhule pe koi madhur giit halkore lene laga ho
vahi narm lahja
kisi shokh lamhe men us ki hansi ban ke bikhre
to aisa lage
jaise qaus-e-quzah ne kahin paas hi apni pazeb chhankai hai
hansi ko vo rim-jhim
ki jaise faza men banafshi chamakdar bundon ke ghunghru chhanakne lage hon
ki phir
us ki avaz ka lams pa ke
havaon ke hathon men an-dekhe kangan khanakne lage hon
vahi narm lahja mujhe chhedne par jab aae
to aisa lagega
jaise savan ki chanchal hava
sabz patton ke jhanjhan pahan
surkh phulon ki paael bajati hui
mere rukhsar ko
gaahe gaahe sharare se chhune lage
main jo dekhun palat ke to vo
bhaag jaae magar
duur pedon men chhup kar hanse
aur phir nanhe bachchon ki manind khush ho ke taali bajane lage
vahi narm lahja
ki jis ne mire zakhm-e-jan pe hamesha shagufta gulabon ki shabnam rakhi hai
baharon ke pahle parinde ki manind hai
jo sada aane vaale nae sukh ke mausam ka qasid bana hai
usi narm lahje ne phir mujh ko avaz di hai
Leave a Reply