Zamin Badli Falak Badla Mazaq-E-Zindagi Badla

zamin badli falak badla mazaq-e-zindagi badla

tamaddun ke qadim aqdar badle aadmi badla

ḳhuda-o-ahrman badle vo iman-e-dui badla

hudud-e-ḳhair-o-shar badle mazaq-e-kafiri badla

na.e insan ka jab daur-e-ḳhud-na-agahi badla

rumuz-e-be-ḳhudi badle taqaza-e-ḳhudi badla

badalte ja rahe hain ham bhi duniya ko badalne men

nahin badli abhi duniya to duniya ko abhi badla

na.i manzil ke mir-e-karvan bhi aur hote hain

purane ḳhizr-e-rah badle vo tarz-e-rahbari badla

kabhi socha bhi hai ai nazm-e-kohna ke ḳhuda-vando

tumhara hashr kya hoga jo ye aalam kabhi badla

udhar pichhle se ahl-e-mal-o-zar par raat bhari hai

idhar bedari-e-jamhur ka andaz bhi badla

zahe soz-e-gham-e-adam ḳhusha saz-e-dil-e-adam

isi ik sham.a ki lau ne jahan-e-tirgi badla

na.e mansur hain sadiyon purane sheḳh-o-qazi hain

na fatve kufr ke badle na uzr-e-dar hi badla

bata.e to bata.e us ko teri shoḳhi-e-pinhan

tiri chashm-e-tavajjoh hai ki tarz-e-be-ruḳhi badla

ba-faiz-e-adam-e-ḳhaki zamin sona ugalti hai

usi zarre ne daur-e-mehr-o-mah-o-mushtari badla

sitare jagte hain raat laT chhaTka.e soti hai

dabe paanv kisi ne aa ke ḳhvab-e-zindagi badla

‘firaq’ ham-nava-e-‘mir’-o-‘ghalib’ ab na.e naghme

vo bazm-e-zindagi badli vo rang-e-sha.iri badla