phir us ke ba.ad badan tha na jaan jaan men thi
ajab chaḌha.i miri umr ki Dhalan men thi
tumhara aks mire ansuon men raushan tha
tumhari shakl bhi har vaqt mere dhyan men thi
tamam umr ganva di talash men us ki
jo ek shai na miri thi na is jahan men thi
mujhe bayan bhi karti thiin dusri ankhen
miri zaban bhi shayad kisi zaban men thi
vo DhunDhta tha jahan par vahan nahin tha main
miri kahani kisi aur dastan men thi
tanab-e-ishq tire haath hi se chhuTi hai
tu ek umr se mashghul khinch-tan men thi
hamare pairon se khiski hui zamin ‘fayyaz’
utaar laa.e use ham jo asman men thi
Leave a Reply