zamin par hi rahe asman ke hote hue
kahin na ghar se gae karvan ke hote hue
main kis ka naam na luun aur naam luun kis ka
hazaron phuul khile the ḳhizan ke hote hue
badan ki jaise havaon ki zad men koi charagh
ye apna haal tha ik mehrban ke hote hue
hamen ḳhabar hai koi ham-safar na tha phir bhi
yaqin ki manzilen tai kiin guman ke hote hue
vo be-niyaz hain ham mustaqil kahin na ruke
kisi ke naqsh-e-qadam astan ke hote hue
har ek raḳht-e-safar ko uThae phirta tha
koi makin na kahin tha makan ke hote hue
ye saneha bhi mire ansuon pe guzra hai
nigah bolti thi tarjuman ke hote hue
hidayaton ka hai mohtaj nama-bar ki tarah
faqih-e-shahr tilism-e-bayan ke hote hue
ajiib nuur se rishta tha nuur ka aḳhtar
kai charagh jale kahkashan ke hote hue