akbar-hyderabadi

Han Yahi Shahr Mere Khwabon Ka Gahwara Tha

haan yahi shahr mire ḳhvabon ka gahvara tha

inhi galiyon men kahin mera sanam-ḳhana tha

isi dharti pe the abad saman-zar mire

isi basti men miri ruuh ka sarmaya tha

thi yahi ab-o-hava nashv-o-numa ki zamin

isi miTTi se mire fan ka ḳhamir uTTha tha

ab na divaron se nisbat hai na bam-o-dar se

kya isi ghar se kabhi mera koi rishta tha

zaḳhm yadon ke sulagte hain miri ankhon men

ḳhvab in ankhon ne kya janiye kya dekha tha

mehrban raat ke saae the munavvar aise

ashk ankhon men liye dil ye sarasima tha

ajnabi lagte the sab kucha o bazar ‘akbar’

ghaur se dekha to vo shahr mira apna tha

More Poems

Leave a Comment