ab bhi guzre hue logon ka asar bolta hai
raah ḳhamosh hai imkan-e-safar bolta hai
shaḳh se TuuT ke rishte nahin TuuTa karte
ḳhushk patton ki zaban men bhi shajar bolta hai
ye to duniya hai tasalsul ka amal jaari hai
bolne vaale chale jaa.en to ghar bolta hai
DhunDne jaa.en to milta hi nahin us ka pata
aur rasta hai ki ta-hadd-e-nazar bolta hai
un ke chehron pe hai tahrir kahan ke hain ye log
un ko jaana hai kidhar raḳht-e-safar bolta hai
aane vaale kisi lamhe ki ḳhabar ho shayad
sar jhuka.e hue ik ḳhaak ba-sar bolta hai
dard ki koi alag se nahin hoti hai zaban
meri avaz men ab saara nagar bolta hai
ghar men baiThe hue kya soch rahe ho ‘at.har’
band darvazon men ḳhud apna hi Dar bolta hai
Leave a Reply