kuchh phuul the kuchh abr tha kuchh bad-e-saba thi
kuchh vaqt tha kuchh vaqt se bahar ki faza thi
kuchh rang the kuchh dhuup thi kuchh dahshat-e-anjam
kuchh saans the kuchh saans men ḳhushbu-e-fana thi
kuchh rang-e-shafaq tez tha kuchh aankh men ḳhuun tha
kuchh zehn pe chha.i tire hathon ki hina thi
kuchh guzri hui umr ki yadon ka fusun tha
kuchh aate hue vaqt ke qadmon ki sada thi
sadiyon se dhaḌakti hui ik chaap thi dil men
ek ek ghaḌi surat-e-naqsh-e-kaf-e-pa thi
donon ko vahi ek bikhar jaane ka Dar tha
main tha gul-e-sad-chak tha aur tez hava thi
‘ḳhurshid’ sar-e-sham tah-e-daman-e-kohsar
dil tha ki vahi koh ki derina nida thi
Leave a Reply