andheron se ulajhne ki koi tadbir karna hai
koi rauzan kisi divar men tasḳhir karna hai
zara dekhun to dam kitna hai is bad-e-muḳhalif men
sar-e-dasht-e-bala ik ghar naya ta.amir karna hai
nikal aaya hai jo bedad rahon par dil-e-be-ḳhud
koi navak-fagan aa.e use naḳhchir karna hai
sar-e-dasht-e-junun jo be-ḳhudi ke phuul khilte hain
unhen raushan dimaghon ke liye iksir karna hai
makan-e-la-makani ka safar mera nahin rukta
tumhari yaad ko ab paanv ki zanjir karna hai
Leave a Reply