Bedam Shah Warsi
na to apne ghar men qarar hai na tiri gali men qayam hai
tiri zulf-o-rukh ka farefta kahin sub.h hai kahin shaam hai
tire ik na hone se saqiya na vo mai na shisha-o-jam hai
na vo sub.h ab miri sub.h hai na vo shaam ab miri shaam hai
na to chakhna jis ka azaab hai na to piina jis ka haram hai
sar-e-bazm saaqi ne di vo mai ki surur jis ka mudam hai
main duaen duun to vo galiyan karen baat baat par bhabtiyan
ye ajiib taur-o-tariq hain ye ajiib tarz-e-kalam hai
vo sitam se baaz na aenge yunhi zulm karte hi jaenge
unhen kya mire ki jiye koi unhen apne kaam se kaam hai
mira dil dahalne laga abhi do-ghadi to duur hai ham-nashin
khabar-e-visal nahin suni ye miri qaza ka payam hai
bache kis tarah se mariz-e-gham na tum aa sako na bula sako
yahi halaten hain to dekhna koi dam men qissa tamam hai
pise dil hazaron tadap gae jo sisak rahe the vo mar gae
uthe fitne hashr bapa hua ye ajiib tarz-e-khiram hai
ajab ashiqon ki namaz hai naya ‘bedam’ un ka niyaz hai
ki qayam hai na quuud hai na to sajda hai na salam hai
Leave a Reply