rang la.ega hamari be-zabani ka hunar
aam hoga ab yahan atish-bayani ka hunar
ik tabassum se jaga di gulsitan ki har ravish
dekhiye us rashk-e-gul ki gul-fishani ka hunar
dosto ye to fareb-o-maslahat ka daur hai
qissa-e-parina hai ab mehrbani ka hunar
ham jise hamraz samjhe the vahi nikla raqib
ham ko le Duuba hamari ḳhush-gumani ka hunar
sach ko kar de jhuuT aur na-mo’tabar ko mo’atabar
dekhiye is daur ki jadu-bayani ka hunar
jazba-o-ehsas ko hai naghmagi dene ka fan
sha.iri ‘sayyad’ nahin lafz-o-ma.ani ka hunar
Leave a Reply