jab nigah-e-talab mo’atabar ho gai
manzil-e-shauq dushvar-tar ho gai
saat-e-gham bhi kya mukhtasar ho gai
teri yaad aai thi ki sahar ho gai
har haqiqat khud apni khabar ho gai
bidat-e-rang sarf-e-nazar ho gai
raat mahfil men vo be-naqab aae the
aur ham ne ye samjha sahar ho gai
apne pindar ki laash dhote rahe
zindagi apni is men basar ho gai
aine se palatti rahi har kiran
har nazar apni hi parda-dar ho gai
koi ilzam jalvon pe aaya nahin
bebasi aankh ki mushtahar ho gai
vo jo aae to sailab-e-nur aa gaya
raushni khud hi sadd-e-nazar ho gai
charasazi na ki haif nazron hi ne
ham ne samjha dua be-asar ho gai
haae phir teri baton men dil aa gaya
phir fusun-saz teri nazar ho gai
apne ijz-e-nazar ka bharam khul gaya
be-hijabi tiri dida-var ho gai
‘tarzi’ qadmon ke badle jabinen milen
na-rasi qismat-e-saag-e-dar ho gai
Leave a Reply