bujh gai aag to kamre men dhuan hi rakhna
dil men ik gosha-e-ehsas-e-ziyan hi rakhna
phir isi rah se milegi nae iblagh ko samt
sher ko dard ka uslub-e-bayan hi rakhna
aah manzar ko ye barfati hui be-safari
saath pighle hue raston ke nishan hi rakhna
kah na sakna bhi bahut kuchh hai riyazat ho agar
zakhm honton ke sar-e-ijz-e-bayan hi rakhna
jaise vo saneha lamha bhi zamana bhi hai ‘saz’
yaad us shakhs ke jaane ka saman hi rakhna
Leave a Reply