KHwahishon Ki Kitab the Jab The

ḳhvahishon ki kitab the jab the

zindagi ka nisab the jab the

apni ungli pakaḌ ke chalte the

ḳhud ko ham dastiyab the jab the

taq-e-mazi ke ye udaas diye

shauq men aftab the jab the

apni ankhon men ab khaTakte hain

chashm-e-yaran ka ḳhvab the jab the

ab mayassar kahan hain ḳhud ko bhi

haan tire be-hisab the jab the

ye jo ankhen bujhi bujhi hain naan

in men bhi chand ḳhvab the jab the

ab jo sukhe paḌe hain qabron par

ye bhi taaza gulab the jab the