jan-bazon ke lab par bhi ab aish ka naam aaya
jis haath men tesha tha us haath men jaam aaya
ik taaza taghayyur hai tahzib ki duniya men
ya husn-e-haqiqi ko andaz-e-ḳhiram aaya
rahat ka tasavvur hi baaqi na raha shayad
honTon pe takalluf se aram ka naam aaya
kuchh soch ke ik rah-e-pur-ḳhar se guzra tha
kanTe bhi na raas aa.e daman bhi na kaam aaya
saaqi ye harifon ko pahchan ke dena kya
jab bazm se ham nikle tab daur men jaam aaya
is tira-nasibi men kirnon ka sahara kya
suraj ki taraf dekha vo bhi lab-e-bam aaya
ye raz-o-niyaz-e-gham kuchh vo bhi samajhte hain
jab choT paḌi dil par palkon ko salam aaya
gham aur ḳhushi donon har roz ke mehman hain
ye sub.h-ba-sub.h aa.i vo sham-ba-sham aaya
phenke hue shishon se dil kitne bana.e hain
jab jaam koi TuuTa divanon ke kaam aaya
kanon men kuchh aati hai avaz phaḌakne ki
phir koi naya taa.ir shayad tah-e-dam aaya
ash.ar-e-‘nushur’ aksar un ki bhi zaban par hain
chup rah na saka koi jab vaqt-e-kalam aaya
Leave a Reply